News

Vacancy Announcement – 2017

Read more...

ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာန၊ တိုင်းတာရေးအမြန်ရေယာဉ်သစ် (၃) စီး လွှဲပြောင်းပေးအပ်ပွဲ အခမ်းအနားကျင်းပ

ရန်ကုန်၊ စက်တင်ဘာလ ၂၄ ရက် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ ကမ္ဘာ့ဘဏ်ချေးငွေဖြင့် အကောင်အထည်ဖော်ဆောင်ရွက်လျက်ရှိသော ဧရာဝတီမြစ်ဝှမ်းဘက်စုံစီမံခန့်ခွဲမှု စီမံကိန်း၊ ကဏ္ဍ ၃ မှ ဝယ်ယူခဲ့သော တိုင်းတာရေးအမြန်ရေယာဉ်သစ် ၃ စီး အား လွှဲပြောင်းပေးအပ်ပွဲအခမ်းအနားကို ၂၀၁၇ ခုနှစ်၊ စက်တင်ဘာလ ၂၄ရက်နေ့တွင် ရန်ကုန်မြို့ အောက်ပုဇွန်တောင်လမ်းရှိ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာန၌ ကျင်းပပြုလုပ်ခဲ့သည်။ အဆိုပါအခမ်းအနားသို့ ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်၊ ရေအရင်းအမြစ်နှင့် မြစ်ချောင်းများဖွံ့ဖြိုးတက်ရေး ဦးစီးဌာန ညွှန်ကြားရေးမှူးချုပ် ဦးထွန်းလွင်ဦး၊ ဝန်ကြီးဌာနလက်အောက်ရှိ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူးချုပ်များ၊ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာနမှ ညွှန်ကြားရေးမှူးများ၊ ဒုတိယ ညွှန်ကြားရေးမှူးများ၊ SEMAS Myanmar Manufacturing Co.Ltd မှ တာဝန်ရှိသူများ တက်ရောက်ခဲ့သည်။ ထို့နောက် ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်မှ အမှာစကားပြောကြားရာတွင် အမြန်ရေယာဉ်များသည် ဧရာဝတီမြစ်ဝှမ်းဘက်စုံးစီမံခန့်ခွဲမှုစီမံကိန်း၏ မြစ်ကြောင်းတိုင်းတာရေးလုပ်ငန်းများတွင် ရေကြောင်းတိုင်းတာရေးလုပ်ငန်းများ ဆောင်ရွက်ရန် ဝယ်ယူခြင်း ဖြစ်ပြီး စီမံကိန်းလုပ်ငန်းများအတွက် အထောက်အကူဖြစ်စေမည် ဖြစ်ကြောင်း၊ ဌာနမှ အရာထမ်းအမှုထမ်းများအနေဖြင့် စွမ်းဆောင်ရည် အရည်အသွေးကို ပိုမိုမြှင့်တင်ထားကြရန် လိုအပ်ပါကြောင်း ပြောကြားခဲ့သည်။ ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးထွန်းလွင်ဦးမှ ရေယာဉ်များ ဝယ်ယူမှုအခြေအနေများအား ရှင်းလင်းတင်ပြရာတွင် ဌာနအနေဖြင့် ဝယ်ယူရေးလုပ်ငန်းစဉ် အဆင့်ဆင့်ကို ကမ္ဘာ့ဘဏ်၏ စည်းမျဉ်းစည်းကမ်းများနှင့်အညီ ပွင့်လင်းမြင်သာမှုရှိစွာ လိုက်နာဆောင်ရွက်ထားရှိပါကြောင်း၊ ရေယာဉ်လွဲှပြောင်းပေးအပ်ပွဲအခမ်းအနားသို့ တက်ရောက်ပေးပါသော ပြည်ထောင်စုဝန်ကြီးနှင့် တကွ ဌာနဆိုင်ရာအရာရှိများကို ကျေးဇူးတင်ရှိပါကြောင်း ပြောကြားခဲ့သည်။ ဝယ်ယူထားသော တိုင်းတာရေးရေယာဉ် (၃) စီးသည် အမြန်နှုန်းမြင့်မားသည့်အတွက် ရေလမ်းကြောင်းတိုင်းတာရေးလုပ်ငန်းများအပြင် သယ်ယူပို့ဆောင်ရေး အထောက်အကူပြုလုပ်ငန်းများ၊ အရေးပေါ် ကယ်ဆယ်ရေးလုပ်ငန်းများနှင့် ရေကြောင်းပြအမှတ်အသားများ စစ်ဆေးခြင်းလုပ်ငန်းများကိုပါ ပူးတွဲလုပ်ဆောင်နိုင်မည်ဖြစ်ပါကြောင်း သိရှိရပြီး သင်္ဘောအရွယ်အစားမှာ အလျား ၈ မီတာနှင့် အနံ ၂.၃ မီတာခန့် ရှိပြီး အင်ဂျင်ပါဝါမှာ မြင်းကောင်ရေ (၁၅၀) ရှိသည့်အတွက် အမြင့်ဆုံး အမြန်နှုန်းအနေဖြင့် ၁ နာရီလျှင် ၇၉ ကီလိုမီတာခန့် မောင်းနှင်နိုင်ကြောင်း၊ ရေယာဉ် ၃စီး၏ စုစုပေါင်းတန်ဘိုးမှာ အမေရိကန်ဒေါ်လာ ၂သိန်း ၂ သောင်းကျော် တန်ဘိုးရှိကြောင်းသိရှိပါသည်။ ထို့နောက် SEMAS Myanmar Manufacturing Co.Ltd, President မှ ကျေးဇူးတင်စကားပြောကြားခဲ့ပြီး ရေယာဉ်များနှင့် သက်ဆိုင်သော စာရွက်စာတမ်းများကို လွဲှပြောင်းပေးအပ်ခဲ့ပြီး ပြည်ထောင်စုဝန်ကြီးနှင့်အဖွဲ့သည် ရေယာဉ်များအား ကြည့်ရှု့စစ်ဆေးကာ ရေယာဉ်လွှဲပြောင်းပေးအပ်ပွဲ အခမ်းအနားကို နံနက် ၁၀း၃၀ နာရီခန့်တွင် ရုပ်သိမ်းခဲ့သည်။
Read more...